Ыам ыйын 22 күнэ-Ньукуолун күнэ сахалар сөбүлүүр бырааһынньыкпыт,самаан сайыҥҥа үктэммипитинэн хас ыал аайы арыылаах алаадьы ,кус сиэниллэр. Ыам ыйын 23 күнүгэр үгэс быһыытынан Мындаҕаайытааҕы норуот айымньытын дьиэтигэр   аҕам саастаахтарбыт,ыҥырыылаах ыалдьыттар булчуттар мустаннар,алаадьы,минньигэс кус,хоргуннаах кус миинэ, саламаат толору астаах сандалы остуолун тула олорон сэһэргэстилэр.эҕэрдэ нүөмэрдэри,баһылык Васильев Р.Г.тыл этиитин иһиттилэр.Тэрээһин саамай долгутуулааҕа,үөрүүлээҕэ  саҥа кинигэ сүрэхтэниитэ буолла. Кинигэ аата «Байанайгыт тосхойдун» бу күҥҥэ оруобуна анаан сөп түбэһэр .Мындаҕаайы кэрэ сирдэрдээх, бултаах-астаах,былыр-былыргыттан улуу сорсуннаах  булчуттардаахпыт. Саҥа кинигэ сүрэхтэниитин олохтоох библиотекарь ыытта.

Бу саҥа кинигэ Дьокуускайга «Ректайм» полиграфическай кииҥҥэ 120 страницалаах бэчээттэнэн таҕыста.Кинигэ сүрдээх тупсаҕай ,сиэдэрэй оҥоһуулаах..,А4 форматтаах,халыҥ переплеттаах.Обложката көмүс фольгалаах оһуордаах,заклепкалаах,тимир уголлаах.Кинигэ биэс түһүмэхтээх «Урукку кэм умнуллубат булчуттара»,»Болугур байанайдаах булчуттара»,»Мындаҕаайы балыксыттара»,»Илии тутуурдаах,өттүк харалаах»,»Мындаҕаайы сирэ -эйигиттэн саҕаланар күн сирэ»..Кинигэҕэ 40 ча булчуттар,балыксыттар ахтыылара,хаартыскалара киирдилэр..Кинигэни хомуйан оҥорууга үлэлээтилэр: Дьячковская М.А.,Попова М.П.,Егорова Т.И.уонна Луковцев Д.Н. Тохсунньуга НВК 5а Мында5аайы булчуттара уһуллубуттарын кэнниттэн кылгас кэм иһигэр үлэлээн кинигэ күн сирин көрдө.

«Байанайгыт тосхойдун» диэн  саҥа кинигэ нэһилиэкпит историятын сырдатар үйэтитиигэ сүҥкэн кылааты киллэрэр ,кэлэр көлүөнэҕэ саха төрүт үгэстэрин тутуһарга,ытыктыырга,айыл5аны харыстыырга   үөрэтиэ диэн эрэнэбит.

Тэрээһин  элбэх киһини мунньан,үрдүк таһымҥа ааста.