1990 сыллаахха балаҕан ыйын 27 күнүгэр М.Е. Николаев салайааччылаах ХХII ыҥырыылаах Үрдүкү Сэбиэт Саха Өрөспүүбүлүкэтин судаарыстыбаннай сүбэрэнитиэтин Декларациятын ылыммыта. Дьоһун докумуон Саха сирин Арассыыйа Федерациятын састаабыгар судаарыстыба быһыытынан биллэрбитэ, Саха Өрөспүүбүлүкэтин саҥа Конституциятын (Төрүт Сокуонун) оҥорууга, өрөспүүбүлүкэ бэрэсидьиэнин дуоһунаһын олохтуурга, Саха Өрөспүүбүлүкэтэ диэн ааттанарга төрүөт буолбута. Үгэс быһыытынан бу күн бырааһынньыктааҕы тэрээһиннэр ыытыллаллар.

Балаҕан ыйын 27 күнүгэр Социалистическай Үлэ Дьоруойа Роман Иннокентьевич Константинов скверыгар үөрүүлээх тэрээһин буолан ааста.Саха сирин былааҕын тутан,сахалыы таҥастаах «Мин сахабын» диэн тиэмэлээх хаартыскаҕа түһүү,бу күн суолтатын,историятын олохтоох библиотека кэпсээтэ, !Сахабыт сирэ сайда ,чэчирии туруохтун» саха бэйиэттэрин хоһооннорун дорҕоонноохтук ааҕыы тэрилиннэ.Тэрээһини Мындаҕаайытааҕы норуот айымньытын дьиэтэ,олохтоох библиотека тэрийэн ыытта.